Ե՞րբ է անհրաժեշտ ՀՀ ներկրված, օտարման տարբեր փուլերում գտնվող ապրանքի դրոշմապիտակի առկայությունը։ Դրոշմավորման ընթացակարգի մասին տեղեկատվություն ստանալու համար դիմեցինք ՊԵԿ։ Ներկայացրեցին հետևյալ օրինակները։

Օրինակ 1

ՀՀ ռեզիդենտ ընկերությունն իրականացնում է ավտոտեխսպասարկման գործունեություն և 2018թ․ փետրվար ամսին ներմուծել է 2710 19 820 0 ԱՏԳԱԱ ծածկագրով ապրանք՝ նավթավերամշակման արտադրանք (այսուհետ՝ ապրանք)։ Ապրանքը ներմուծվել է տակառներով և մուտքագրվել ընկերության պահեստ, որտեղից ապրանքի օտարում չի իրականացվում։ Ընկերությանը պատկանող չափիչ տարայի (սարքի) միջոցով, ըստ պահանջարկի, պահեստից անհրաժեշտ քանակի ապրանք տակառից տեղափոխվում է վաճառակետ (ցուցասրահ), որտեղից տեղի է ունենում ապրանքի օտարում ընկերությանը պատկանող չափիչ տարայի (սարքի) միջոցով՝ ավտոտեխսպասարկում իրականացնելու նպատակով։

Օրինակ 2

ՀՀ ռեզիդենտ Ընկերությունն իրականացնում է ավտոտեխսպասարկման գործունեություն և 2018թ․ փետրվար ամսին ներմուծել է 2710 19 820 0 ԱՏԳԱԱ ծածկագրով ապրանք՝ նավթավերամշակման արտադրանք (այսուհետ՝ ապրանք)։ Ապրանքը ներմուծվել է տակառներով և մուտքագրվել ընկերության պահեստ, որտեղից ապրանքի օտարում չի իրականացվում։ Ընկերությանը պատկանող չափիչ տարայի (սարքի) միջոցով, ըստ պահանջարկի, պահեստից անհրաժեշտ  քանակի ապրանք տակառից տեղափոխվում է վաճառակետ (ցուցասրահ), որտեղից տեղի է ունենում ապրանքի օտարում գնորդի կողմից տրամադրված տարայի միջոցով։

Ինչպիսի՞ն է նկարագրված դեպքերում ՀՀ տարածք ներմուծված ապրանքների դրոշմավորման ընթացակարգը

Օրենսգրքի 390-րդ հոդվածի 2-րդ մասի համաձայն’ Հայաստանի Հանրապետության տարածքում արտադրված կամ Հայաստանի Հանրապետության տարածք ներմուծված’ շշալցված կամ ցանկացած այլ կերպ տարավորված (փաթեթավորված)’ նույն հոդվածի 1-ին մասով սահմանված ապրանքների վրա Հայաստանի Հանրապետության տարածքում օտարման ցանկացած փուլում դրոշմապիտակի առկայությունը պարտադիր է, եթե այդ ապրանքներն օտարվում կամ սպառվում են նույն տարայավորմամբ (փաթեթավորմամբ) ու ապրանքային տեսքով’ առանց քաշը (ծավալը) փոփոխելու:

Ներմուծված յուղի ապրանքային տեսքը փոխելու դեպքում կամ այլ տարավորում կատարելու դեպքում անհրաժե՞շտ է արդյոք դրոշմապիտակ։

Նկարագրված երկու դեպքում էլ կազմակերպության կողմից ներմուծված ապրանքն օտարվում է ներմուծման տարայից (փաթեթավորումից) տարբերվող այլ տարավորմամբ (փաթեթավորմամբ) ու ապրանքային տեսքով’ քաշը (ծավալը) փոփոխելով, հետևաբար, այն դրոշմապիտակով դրոշմավորման ենթակա չէ: Սակայն անհրաժեշտ է հաշվի առնել, որ եթե կազմակերպությունը ներմուծած յուղը օտարում է ներմուծված տարաներով կամ ներմուծած յուղը տարավորում և օտարում է տարբեր տարողության տարաներով, ապա դրոշմավորման ենթակա են ներմուծված տարաները կամ այդ տարբեր տարողության տարաները: